Eyrún hefur skrifað, eða komið að skrifum, níu bóka; tvær þeirra eru sagnfræðilegs eðlis, ein ævisaga, ein barnabók, tvær sögulegar skáldsögur og eina sagnabók. Þá var hún meðritstjóri ásamt þremur öðrum í einni bók en nýjasta bók hennar er ljóðabók.
2024 Upphafshögg – Ljóð um listina að spila golf
2021 Konan sem elskaði fossinn
2012 Ljósmóðirin
2005 Ríkey ráðagóða, (barnabók)2005 Sagnamaðurinn Örn Clausen segir sögur af samferðafólki
2002 Konur með einn í útvíkkun fá enga samúð: Fæðingarsögur íslenskra kvenna (Ritstjórn ásamt Margréti Jónsdóttur Njarðvík,
Sóleyju Tómasdóttur og Svandísi Svavarsdóttur)
1998 Gengið á brattann: Ævisaga Eyjólfs R. Eyjólfssonar „alkakrækis“
1995 Að Laugarvatni í ljúfum draumi: Saga Húsmæðraskóla Suðurlands
1992 Saga Húsmæðraskóla Reykjavíkur í 50 ár
Upphafshögg – Ljóð um listina að spila golf
er fyrsta ljóðabók Eyrúnar Ingadóttur.
Þar fjallar hún um erfitt en viðkvæmt ástarsamband sitt við golfíþróttina en bókin er tileinkuð öllum þeim sem ganga um golfvelli í íslensku sumarveðri, vongóðir um að veðurspáin breytist til hins betra. Í ljóðabókinni eru 36 ljóð, tveir golfhringir, af ljóðum sem bæði golf- og ljóðaunnendur geta ornað sér við á köldum vetrarkvöldum.
Ljóðabókin er hönnuð af Gabríel Benedikt Bachmann og er hver síða listaverk. Sjá ljóðaslamm frá útgáfuteiti
Úr umfjöllun Soffíu Auðar Birgisdóttur í Són, tímariti um ljóðlist og óðfræði 23/2025: „Þegar ljóðin 36 eru lesin kemur nefnilega í ljós að Eyrún er að yrkja um annað og meira en golf. Golfið er nefnilega hugvitssamlega notað sem táknheimur sem vísar út fyrir sig og beinast liggur við að álykta að ljóðin fjalli um ástarsamband, upphaf þess og þróun – og endalok.“ Einnig segir í umfjölluninni: … Upphafshögg er mjög áhugaverð ljóðabók og sýnir nýja hlið á ritstörfum Eyrúnar sem er þekkt fyrir annars konar verk, sagnfræðilgar skáldsögur og ævisögur. Undirrituð hafði gaman af því að lesa og pæla í bókinni þótt golfáhugann vanti algjörlega. Það kann að vera að þeir sem eru innvígðir í þá íþrótt njóti ljóðanna enn betur og sjái dýpri merkingu á því tvöfalda sviði sem þar er brugðið upp.“
Konan sem elskaði fossinn – Sigríður í Brattholti
er söguleg skáldsaga sem kom út árið 2020.
Viðtal við höfund á RÚV 12. október 2020. / Viðtal í Kiljunni haustið 2020
Sigríður í Brattholti (1871–1957) er einn kunnasti náttúruverndarsinni Íslandssögunnar. Hún bjó alla sína ævi í nágrenni við Gullfoss og þegar upp komu hugmyndir um að virkja fossinn hóf hún ein og óstudd baráttu gegn þessum áformum, baráttu fyrir málstað sem hún var tilbúin að fórna lífinu fyrir. Um áratugaskeið talaði Sigríður máli fossins og vildi að hann fengi að „flæða af hamrinum … óhaggaður af höndum manna“. Í fyrstu var það fyrir daufum eyrum en smám saman jókst samúðin með málstað hennar. Samhliða þessu þurfti Sigríður að glíma við erfiðleika á heimili sínu og í einkalífi.
Konan sem elskaði fossinn er stórbrotin baráttusaga sem lætur engan ósnortinn.
Ljósmóðirin
er söguleg skáldsaga sem kom út árið 2012.
Ljósmóðirin er söguleg skáldsaga sem segir sögu Þórdísar Símonardóttur ljósmóður á Eyrarbakka á árunum í kringum aldamótin 1900. Tvívegis fann hún ástina og tvívegis glataði hún henni. Hún barðist gegn yfirgangi og kúgun valdamanna sem beittu öllum ráðum til að beygja hana niður í duftið. Hún gafst aldrei upp, reis á fætur þegar hún var snúin niður og glataði aldrei trúnni á hugsjónir sínar.
Eyrún Ingadóttir byggir þessa áhrifamiklu bók á heimildum af ýmsu tagi um ævi og störf Þórdísar. Með eftirminnilegum hætti dregur hún persónur og atburði fortíðarinnar út úr skjalasöfnum inn í heillandi heim skáldsögunnar. Höfundur er sagnfræðingur að mennt og hefur áður skrifað ævisögur og önnur rit um sagnfræðileg efni.
Ríkey ráðgóða
Skemmtileg bók fyrir 6-12 ára krakka. Kom út árið 2005.
Ríkey er ellefu ára og tekur að sér að passa Dódó litlusystur yfir sumarið þótt hana langi meira til að komast á sjóinn með afa. Þegar mamma og pabbi flytja tölvuna í geymslu upp á háaloft með þeim orðum að börn eigi að leika sér úti á sumrin – þá eru góð ráð dýr. Ríkey og félagar hennar deyja ekki ráðalaus. Þau reisa heilt þorp og halda hátíð með tónlist og trúðum, skrípafötum og skrúðgöngu, leynigesti og ókeypis ís handa öllum. Hvert ævintýrið rekur annað í þessari fyndnu og fjörugu sögu Eyrúnar Ingadóttur. Ekki spillir það ævintýrum sumarsins að eiga góða vini í hópi fullorðinna, eins og hann Sóla á Strönd sem býr á hálfgerðu þjóðminjasafni og skýrir hænurnar sínar í höfuðið á ríkisstjórninni.
Sagnamaðurinn Örn Clausen
Í bókinni Sagnamaðurinn Örn Clausen lætur þessi kunni hæstaréttarlögmaður og fyrrum frjálsíþróttakappi gamminn geysa um fólk sem hann hefur kynnst á lífsleiðinni. Hér segir hann yfir eitt hundrað sögur af góðkunningjum sínum og lögreglunnar, ráðherrum og pressara, íþróttagörpum og athafnaskáldum, rónum og broddborgurum en síðast en ekki síst af sjálfum sér og tvíburabróður sínum, Hauki, svo aðeins nokkrir séu nefndir. Örn er annálaður sagnamaður og er orðkynngi hans alkunn. Skemmtilesning hvort sem Örn segir af eigin góðkunningjum eða lögreglunnar.
Konur með einn í útvíkkun fá enga samúð
Skyldulesning fyrir fólk sem starfar í heilbrigðisgeiranum
Þessi bók er hvalreki, ekki síst fyrir starfsmenn í heilbrigðisgeiranum sem koma að málefnum barnshafandi kvenna á einhvern hátt. Bókin ætti að vera skyldulesning fyrir ljósmæður og ljósmæðurnema, lækna og hjúkrunarfræðinga og annað starfsfólk á heilsugæslustöðvum og sjúkrahúsum. Þá hygg ég að foreldrar og verðandi foreldrar muni sækjast eftir að lesa bókina – og jafnvel einhverjir þeirra sem ekki eiga börn og ætla sér ekki að eiga börn því ekki er síður áhugavert að kynna sér „framandi heima“ en hina kunnuglegri.
Gengið á brattann
Gengið á brattann er ævisaga Eyjólfs R. Eyjólfssonar „alkakrækis“ er skráð af Eyrúnu Ingadóttur. Í kynningu segir að Eyjólfur R. Eyjólfsson hafi farið með fulla skjalatösku af frumsömdum ljóðum í áfengismeðferð á Silungapoll árið 1979 og hélt hann að þar gæfist góður tími til að yfirfara þau.
Að Laugavatni i ljúfum draumi
Árið 1929 voru fyrst reifaðar hugmyndir um stofnun húsmæðraskóla á Suðurlandi á fundi Sambands sunnlenskra kvenna. Húsmæðraskóli Suðurlands á Laugarvatni hóf svo starfsemi í janúar 1943, fyrst sem deild innan Héraðsskólans, en varð sjálfstæður haustið 1944. Í bókinni er greint frá baráttu Sambands sunnlenskra kvenna fyrir stofnun skólans og saga hans rakin þar til hann var lagður niður árið 1986. Lífi kennara og námsmeyja í skólanum eru gerð skil, bæði í leik og starfi.
Saga Húsmæðraskóla Reykjavíkur í 50 ár
Segir frá baráttu kvenna í Reykjavík fyrir stofnun skóla fyrir verðandi húsmæður og þeirri menningu sem þar ríkti.